ياهو دا .... السودان

ياهو دا السودان

أي واحد بقول بلدي عز ومجد وأمان وبضحي من أجله والمشاكل الحاصله عليهو كلها بسبب الطغيان وعنجهية الأسياد ، وتبعية الأوغاد ، كان علي الكهرباء الدافعين قروشها قبال ما تصلنا هي ما جايه من موية نيلنا السوداني وطالعه من الرصيرص وسنار وديل حتهن كمان في السودان وعشان نحن سودايين مافي داعي للزعل وصرت البوز طالما خيرنا مننا وفينا 0

والمويه الجايانا من البحر واللا الحفير وان شاء الله من البير برضها مويه سودانيه وداخل بلدنا السودان وما بنزعل ، كان قطعوها مننا ولا أدونا ليها بالخراجى والترله صفيانه ولا عكرانه .

والتعليم كان إتسجم وإترمد برضو ما بنزعل ، المعلم ما سوداني كان إتكل علي الماهية ولا إشتغل بالخصوصيه ، والمنهج البدرسوه حتو كمان مو سوداني ، والجهال والبنوت البتعلموه حتهن كمان سودانيين ، اهـ بعد دهـ كلو في طريقه نزعل بيها ، ماكلو سوداني × سوداني .

المستشفيات والمستوصفات كان انعدمت فيها حبة البندول وكان زعلنا وكان طقينا برضها سودانية ، ونزعل كيفن منها , ما الوالد والعم وكل الحبايب براجعوها وكلهم أهل وسودانيين , وما بنسي حريمنا وأخواتنا وبناتنا البموتن في الولاده كمان سودانيات والعمر عند الله ، وبعد مايموتن بندور نجدعن للكلاب حاشا وكلا , ومن غير زعل رايحين وجايين دافننهن في السودان اه قولوا لي كيفن الطريقة للزعل .

وبعدين كمان الجنوب ذاتو كان قالوا انفصل والله فت واحد فينا بزعل مافي والزعل الله لا جابو ماهم برضو اخوانا وسودانيين وين بروحو مننا كان طاروا السماء ياهن باقين لينا جيران والجيران مننا وفينا ، وكان قالوا دارفور بقت تشادية والشرق اتلم علي الحبوش برضوا ما بنزعل لاننا في النهاية وكان طال الزمن ولا قصر وكان اتفرقنا ولا اتلمينا نحن سوانيون والسودانيون أخوان وين ماكانوا ووصيتى ليكم بس أبقو عشره علي روحكم وما تنسوا إنكم سودانيون , والسودانيون مشهود ليهم ، بالقليل راضين ، وبالسماح والطيبه عامرين ، ومصيبتنا ومغستنا ما في زول بحس بينا وشايل همنا ولا ما كان بقت دى حالتنا , والبركة في رحمة الله السعتنا , والمزروعه من عندو في الزلط بتقوم , والشكوى لغيره مذله والنفسو بتحدسوا أقول البقرة في الإبريق .

من طرف bashirahmed الثلاثاء نوفمبر 02, 2010 11:05 pm

لك التحية وانت تطرق وتدق بعنف على كل الابواب والزعل مرفوض ولكن لم تكمل الموضوع منو السجمنا ومنو الرمدنا ديل اولادك يا نيل كالوا في الجراح وزادو الهموم وشالو من همومن وادونا وختونا في جحر ضيق وياهو ده السودان وهم مشو لى فسحة واسعة وهوا بارد لاكهربا تقطع لا موية عكرانة ولا ماسورة تشخر ديل صهريج فوق صهرباء ومولد احتياطي ومولد للاحتياطي واذكر في احد مظاهرات الطلاب والدنيا صيف والكهرباء قاطعة كم يوم وهتافات المظاهرين جوطي جوطي يا خرطوم وبعد قمع المظاهرات وناسو واحدين راحو في ستين الباقين سمعو صوت الكيزان يعلوا في منابر واركان النقاش وبتبجح كمان انتو لو دايرين تغيروا النظام الا تحفروا مقابرر بعدد الكيزان والشيخ البتتكلوا عنو ده هو زاتوا الكهرباء عندوا ما قاعدة تقطع علشان يعرف الكهرباء قاطعة ولما ما قاطعة ده عندوا مولدات اتوماتيك كل ما يقيف واحد يشتغل واحد تاني -- اتخيل ياهو ده السودان - ناس مويتا قاطعة وناس عكرانة والله انا مرة الماسورة في ودراوة الموية ضعفت شديد ولما كان موية التانيين شغالة كويس عرفت انو المشكلة خاصة بي انا وفكيت البلف بالمفاتيح واتخيل والله على ما اقول شهيد لقيت ابو الجعران قافل البلف حا يكون جا من وين طبعا جاء من خط الموية ايم موية الحفر الجنب الصهريج ايام قالوا دي موية البحر ويا ما ناس لقوا بس مالقوا الدهب - يا اخي ديل ناسهم بقروا مدارس واتخيل انو في مدرسة السنة بي خمسة وعشرون مليون جنية بالقديم واساس طبعا وتتراوح المدارس في اسعارها والقبس السنة بي سبعة مليون ودي بتاعت المتواضعين بقت ونواصل باذن الله

الاخ بشير الشكر اجزله وانت تعضد من المعاناة علي الرغم من محاولة جبر الكسر وزى ما بقولوا المدفوره ما بتصل - اما السودان البلد والرجال الشموخ والعذه والله ما فيه كلام وانما اياك اعنى واسمعى ياجاره 0
مع الود والتقدير
تخريمه
لو سمحت لي استأذنك باعادة تدوين ولو شئ بسيط من المحذوف مرة اخرى عل الذكرى تنفع والزعل مرفوع 0 تحياتى

من طرف basmaahmed الثلاثاء يوليو 16, 2013 7:19 am

شكرا على تعبك

ياهو دا .... السودان

ياهو دا .... السودان

رد: ياهو دا .... السودان

رد: ياهو دا .... السودان

رد: ياهو دا .... السودان